政Whats噏：周庭咳到甩肺　羅冠聰同女友又喵又汪想點？

健康幾時都最重要，病咗好辛苦，特別係斷唔到尾嘅時候！好似香港眾志成員周庭最近就咳得好厲害，一連幾日喺Facebook發文講自己嘅病況，雖然全部貼文都簡短，但絕對睇得出佢有幾咁頂唔順！

事關佢最初發文已經講明「跪求聽日出到聲」，即係似乎已經開唔到聲，不過幾日嚟唔單止冇好轉，仲每況愈下，例如反問「如果咳得太犀利，個肺係咪真係有機會甩架(㗎)？」，又話「Feel到個肺甩甩地」，甚至嚴重到連佢唯一嘅減壓方式唱歌都冇埋！

唔少網友見周庭病到咁，畀咗唔少建議佢，提醒佢多啲休息。然而喺佢其中一段打咗好多個「咳」字嘅貼文入面，就見到佢戰友羅冠聰嘅回覆，不過佢只係打咗好多個「喵」字，而羅嘅女友袁嘉蔚亦留低咗好多個「汪」字，睇落就完全冇關係，甚至唔知佢哋想表達啲乜，都唔知呢對情侶係想搞事贈慶，定係提供緊獨特嘅治咳方法喇！