政Whats噏:鉛水風波甩身 林天星任海洋公園董事

20190628
東網電視
更多新聞短片
林天星在鉛水風波中全身而退,至今日更被委任為海洋公園董事。(設計圖片)
政府近年愈來愈鍾意委任前高官出任公職,可能貪佢哋身家清白,冇咁易被人質疑有官商勾結,加上本身比較熟政府運作,講起政策都唔使解釋得咁多,不過呢啲貪就手嘅委任方式,有時都會出事。政府今日(28日)公布委任水務署前署長林天星做海洋公園董事,林天星任內爆發鉛水風波,被獨立調查報告批評「專業不足」及「固執己見」,表現令人失望,但佢一直堅拒問責下台,後來仲「全身而退」順利退休,退休金同長俸袋袋平安,備受外界批評。點知依家仲要獲委任做海洋公園董事,真係替啲海洋動物擔心。
政府今日公布委任海洋公園董事局成員名單,新成員包括新世界發展主席鄭家純女婿龐建貽,以及林天星,任期兩年,由下月1日開始。同樣係水務署前署長嘅馬利德就即將卸任,真係令人懷疑海洋公園董事係咪一定要有水務署前署長擔任。馬利德咁啱由下月1日起出任九鐵總裁,政府啲公職換嚟換去,都係專門委任前高官。
商務及經濟發展局發言人就話,相信憑着董事局成員嘅熱誠同喺不同範疇嘅專業知識,海洋公園會繼續發展成為世界級康樂及教育公園。講開專業知識,林天星正正曾被食水含鉛超標調查委員會報告批評「專業不足」。
2017年底退休嘅林天星,擔任水務署署長4年期間,爆出屋邨食水含鉛事件,獨立調查報告不但批評一眾持份者集體失職,更炮轟林喺水質科學方面嘅專業知識可能不足,而且一意孤行,未有採取較佳嘅水質取樣方法。事後要求涉事官員下台嘅聲音此起彼落,但林回應時僅形容自己「心裏面有沉一沉」,並就事件道歉,卻未有請辭。
其後林天星一直堅拒下台,及後佢踏入退休年齡,預計可獲取一筆過逾1200萬港元嘅退休金,另加每月7萬幾蚊嘅長俸,其時已備受質疑,點解咁都可以全身而退,乜事都冇,點知依家仲有得做海洋公園董事添,成件事認真諷刺。負責委任嘅高官,係咪應該去驗吓對眼,又或者驗吓個腦有冇事呢?試問點對得住受鉛水事件影響嘅居民?