政Whats噏:李美嫦放「暑假」一個月 康文署有急事邊個理?

20190630
東網電視
更多新聞短片
李美嫦暑假唔返工,仲放足成個月假添。
7月將至,暑假來臨,除咗小朋友充滿期待,唔少大人都會放大假去旅行。好似康樂及文化事務署署長李美嫦由尋日(29日)開始,放假到7月29日,足足一個月咁耐,聽落幾寫意,不過暑假係搞康樂活動嘅高峰期,康文署應該好多事務要跟進,李美嫦喺呢個時間放大假,仲要放成個月,點睇都唔太適合喎!
其中一個康文署好需要喺暑假處理嘅題目就係炒場,一來學生放假會用多咗康文署設施,二來唔同團體搞活動都會租用康文署場地,如果康文署依然好似平時咁,對炒場翹埋雙手唔理,受苦嘅始終就係市民,都唔知李美嫦係冇心處理定係有心避難,睇怕今個暑假都依然有唔少市民要捱貴場喇!
另一個例子就係泳池同泳灘,事關夏日炎炎,唔少人都會選擇去游水消暑,偏偏康文署轄下嘅泳池同泳灘不時都出現救生員唔夠嘅問題,甚至有時會因而關閉,查實唔少市民都係暑假先會去游水,如果冇得游都真係相當掃興,加上暑假係打風季節,可能好多時設施都需要作出臨時安排,依家李美嫦放成個月大假,到時出大事,唔知係咪肯銷假返工呢?