政Whats噏：梁明堅梁智峯拍住上　一文一武啱啱好

元朗區議員梁明堅同哥哥、十八鄉鄉事委員會副主席梁智峯早前一齊出席活動，唯獨唔見爸爸、十八鄉鄉委會前主席梁福元嘅身影，但兩兄弟就話佢哋一文一武啱啱好，難怪爸爸咁放心交棒喇！

佢哋兩兄弟都話以往多年喺爸爸保護下工作累積經驗，而現時新界鄉議局講求年輕化，加上又要講城鄉共融，所以一個喺鄉村工作，另一個就主力屋苑，有晒分工。

相比起細佬梁明堅，梁智峯進入鄉議局時間短得多，而且作風都幾低調，唔及爸爸咁搶鏡喎。佢就自言較文靜，所以喺前線衝鋒陷陣嘅工作交畀爸爸同細佬，不過兩兄弟性格一文一武，咁先可以互補長短。

梁明堅就透露，兩兄弟互相照應外，佢哋嘅仔女都一樣，因為佢三個囡囡年紀細，相反哥哥早婚仔女較年長，幫到手照顧三個囡。齋聽都感覺到佢哋兩兄弟關係緊密喇！