政Whats噏：邊個咁有分量令袁彌昌三兄妹合體？

有唔少父母都會將幾個仔女送入同一間學校，令小朋友可以互相照應，亦方便接送。日前新民黨前政策總裁袁彌昌(Derek)罕有地同家姐，以及妹妹、人民力量前主席袁彌明合體，出席活動賀一名男子榮休。到底邊個咁有份量？

Derek介紹呢位甘Sir係佢哋三姐弟嘅小學老師，但教乜就唔太記得嘞，話好似係數學同體育，笑言以前嘅老師乜都教，但肯定甘Sir係袁彌明嘅班主任喎，自己畢業後留喺舊生會先有機會見甘Sir多啲，覺得佢教咗45年退休，真係唔捨得。

咁以前有無百厭被罰？佢堅定話無，因為大家讀寄宿學校，有社監睇住，邊夠膽曳吖！佢又話同家姐相差5年，掹車邊可以同學校生活，當時自己一年級，家姐6年級，咁啲風紀又係6年級，大家都會照顧佢呢個小弟弟。咁咪即係有特權？Derek笑話，家姐就係咁用㗎嘛，不知幾方便添！