政Whats噏:鬧完副局政助冇影 葉劉向新聞處開刀

20190715
東網電視
更多新聞短片
葉劉淑儀拉埋黨友容海恩向政府新聞處「開刀」,處長朱曼鈴遭殃。(設計圖片)
現年68歲嘅新民黨立法會議員葉劉淑儀(葉劉)愈來愈好火氣,繼早前公開發炮點名鬧爆多個政策局副局長同政治助理「冇影」,今日再向新聞處「開刀」。葉劉怒轟政府新聞統籌同宣傳工作嚴重不足,特別係網絡方面,完全同社會脫節喎。睇嚟負責政府整體統籌安排傳媒採訪嘅政府新聞處處長朱曼鈴,今次都係責無旁貸嘞!
葉劉雖做過「局中人」但對時下團隊嘅不滿,幾乎係琅琅上口,隨時都可以發炮。早喺今年3月時,佢已經喺一個立法會大會上,質詢政府到底聘請副局長同政助時有冇統一標準,同埋有冇為佢哋提供相關培訓等。換句話,即係覺得佢哋唔夠水平,仲點名提到財經事務及庫務局嘅政助楊寶蓮最少蒲頭添!
近月社會局勢動盪,葉劉今日就拉埋黨友容海恩同政府高層會面,仲以「數白欖式」點出社會各項問題,包括冷氣機滴水、房屋漏水、噪音、野豬、野鴿、土地供應、託兒中心名額等,總之訴求種類包羅萬有,想得到都反映到。此外,一直狙擊兼草擬法案要求規管領展嘅葉劉亦再次要求政府,要正視同盡快處理「三座大山」,即係領展、港鐵同強積金對沖機制嘅問題。
葉劉仲特別提到,政府嘅新聞統籌同宣傳工作嚴重不足,特別係網絡方面,完全同社會脫晒節,以至喺今次修訂《逃犯條例》過程中,面對各種失實流言都無法有效回應,以正視聽,促當局重整兼加強宣傳工作,今後公開回應要做到「快、多、真」。
咁又難怪嘅,回帶睇番以前新聞處確實做嘢「甩甩漏漏」,由安排傳媒採訪、發新聞稿,甚至發相都試過出錯。其中喺舊年除夕當日,土地供應專責小組公布報告時,記者要席地而坐記錄內容,已屆六旬嘅小組主席黃遠輝更企足一個鐘做回應,而中環灣仔繞道被揭發大滲漏,竟然首先安排議員去睇,跟住搞步行籌款,市民亦睇到隧道有滲水嘅情況,最後先安排傳媒採訪等。
喺土供組同繞道事件後,政府高層就公開「自動投案」話採訪安排有改善空間,明插朱曼鈴做嘢唔掂。經過今次再由「熱廚房」出身嘅葉劉發炮,睇嚟朱曼鈴真係要好好反省問題喺邊,唔好繼續意見接受,態度照舊!