政Whats噏︰葉劉評分跌至2.65分　為跌幅最大議員

身兼行政會議成員嘅新民黨立法會議員葉劉淑儀(葉劉)，早前力挺政府修訂《逃犯條例》，政府「跪低」宣布暫緩修例後，葉劉被點名要求辭去行會成員職務。有最新民意調查指，市民對葉劉嘅評分為2.65分，較上次同類調查大跌0.39分，成為評分跌幅最大議員。葉劉喺議會內冇乜助力，好似單打獨鬥咁，唔知幾時先追番落後嘅分數？

香港研究協會喺上月19日至本月9日訪問咗1365名市民，以調查市民對議員表現嘅評分，以1分為最低分，5分為最高分，葉劉評分跌至2.65分，較去年11月至12月進行的調查跌咗0.39分，不過都仲係港島區最高分嘅議員。

調查機構就話，結果顯示市民對絕大部分議員嘅評分都係低於3分嘅一般水平，反映唔少議員嘅表現都未符合市民期望，機構仲呼籲班議員要認真檢討工作上未達完善之處，積極為香港走出困局獻計，爭取多啲市民支持。不過，似乎葉劉應該諗計幫自己走出困局先喇。