政Whats噏：撞樣撞身形　陳嘉華同胡慧沖係失散兄弟？

有人會撞名，有人會撞樣，搞到認錯人。有人就話樂善堂當年委員陳嘉華(Jeffrey)同「泰國通」胡慧沖係失散嘅兄弟添！係真唔係呀？

Jeffrey日前喺Facebook上載咗張同胡慧沖嘅合照，仲貼文話「有人話我哋係失散嘅兄弟，呢位仁兄好難約！終於在香港見面喇！」老實講，佢哋嘅身形差唔多，都係肥肥哋、臉圓圓，又係戴黑框眼鏡，真係有幾分似樣嘅。

個post(貼文)出咗之後，有網友就讚佢哋一樣英俊，亦有網友就話佢嚟緊會去曼谷，可唔可以約胡慧沖？Jeffrey就好俏皮咁話「你帶埋我去可能有機會」。呢位網友會唔會考慮吓陳嘉華嘅建議呢？又博唔博到見胡慧沖呢？