政Whats噏：岑子杰投訴蔣麗芸歧視　平機會稱無法跟進

立法會議員蔣麗芸(Ann)言論一向惹火，好似前排喺社交網絡上發表有關民陣召集人岑子杰性取向嘅短片，結果換來岑子杰聯同首位出櫃立法會議員陳志全向平機會投訴。而平機會今日(23日)就作出回覆指無法進一步跟進。

岑子杰等人喺上周五(19日)作出投訴，並要求平機會五日內回覆，否則唔排除發起社區遊行，當日阿Ann已經喺網上反駁，強調從無歧視同性戀，又指岑已出櫃就應坦然面對，咪動不動就怨天怨地話遭攻擊喎。

而平機會今就回覆傳媒查詢，指收到若干查詢同投訴，但事件都唔屬於現行四條反歧視條例所涵蓋範圍，所以未能作進一步跟進，亦未能按現有法例機制去處理相關投訴喎。不過，平機會都話該短片雖不違法，但都唔恰當，任何人表達意見時應以事論事，而非用無關議題嘅考慮如性傾向去作為論述，睇嚟平機會跟進唔到，都認為阿Ann有唔啱喎！