政Whats噏：平機會新丁黃梓謙　叫Ann姐向同志道歉

立法會議員蔣麗芸(Ann)早前喺社交平台上載有關民間人權陣線召集人岑子杰性傾向嘅短片，其後岑向平等機會委員會投訴有關內容涉歧視同附有貶義嘅字句。平機會日前已回覆指上載該短片雖不違法，但都唔恰當。以為風波已告一段落，但平機會委員黃梓謙(Gary)就認為Ann嘅言論確實帶有歧視成分，希望Ann向岑及同志社群道歉。

Gary喺5月中被委任為平機會成員，可謂係平機會「新丁」。日前佢喺社交網站貼文，提及有關對Ann嘅投訴，話好遺憾香港現時未有法例機制處理有關投訴，而佢唔單止認為Ann嘅言論帶有歧視成分，更希望Ann向岑子杰及同志社群道歉，同時亦都希望社會大眾可以尊重各種性傾向嘅人，少一點歧視，多一點包容。

佢又透露，最近曾以個人身份與性小眾人士會面，深深了解佢哋喺生活上嘅困難，體會到香港喺保障唔同性傾向人士方面嘅不足。佢又話，會繼續喺佢嘅崗位上努力，推動立法保障不同性傾向人士，免受唔合理嘅歧視同對待。