政Whats噏：立法會大樓爛晒　陳維安下月卻放假

立法會大樓近日受示威者衝擊，搞到全幢都爛晒，真係唔知幾耐才整得完，建築署回覆話依家傾緊修復工程嘅施工方法，預計唔到要幾多錢維修，與此同時，立法會秘書長陳維安原來下月二日起放大假，放足二十日，唔通佢有信心呢幾日內會傾完施工方法？

立法會大樓受衝擊後，秘書處月初公布，立法會大樓有六十一塊大型玻璃面板受損，閉路電視系統徹底損壞，消防安全系統完全無法運作。建築署回覆指，應立法會要求負責部分修復工作，由於損毀部分涉及範圍甚廣，有關修復工程嘅施工方法及安排仍在商討中，故此現階段未能預計整體修復金額。

維修要幾多錢都未計好，就連施工方法同安排都仲傾緊，但係秘書處嘅「大內總管」陳維安就喺下月二日起放廿日大假，期間要副秘書長梁慶儀兼任職務。喺立法會大樓要維修嘅風頭火勢之際，陳維安竟然走咗去，唔睇住維修進度，唔知係咪見到既然開唔到會，維修嘅嘢，自己都幫唔到手，所以不如放下假嘞！