政Whats噏：陳積志生蠔當飯食　又食又拎

每個人嘅口味都唔同，但生蠔當飯食，大家又點睇呢？邊個？咪係民政事務局副局長陳積志囉！

話說日前有晚8點幾路過中環IFC，喺一個賣生蠔同紅酒嘅攤位附近見到陳積志，當時佢正企喺自助枱前食嘢，見佢攞住啲生蠔嗅下味道，跟住就啜落口嘞，睇佢個樣真係食得好滋味㗎！仲要連食4隻添！聽職員講，佢食嘅係日本北海道生蠔，每隻42蚊，即係呢餐盛惠168蚊。

本來以為佢食完就走，點知佢跟住仲買多半打生蠔拎走，究竟係意猶未盡定係欲罷不能呢？呢半打生蠔唔止係嚟自日本，仲有嚟自法國嘅，售價係268蚊。

食咗四隻都唔夠，仲要打包多半打生蠔，一時間消唔消化到呀？我哋上前同佢打招呼，佢話呢排好忙，嗰晚有啲時間咪去食囉，跟住仲要返政府總部做嘢添！問佢咁夜食兼外賣生蠔，係咪當飯食呀？佢答話係，仲直認好鍾意食生蠔添！再追問佢鍾意食邊度產地嘅生蠔同一次可以食幾多隻？佢就笑住話唔講嘞，轉頭就離開。