政Whats噏：再有核心成員離巢　湯家驊眾叛親離

政府修訂《逃犯條例》惹起軒然大波，外界已強烈要求湯家驊辭去行政會議成員一職，點知由佢一手創立嘅民主思路，繼聯席召集人麥嘉晉同商務及經濟發展局局長政治助理馮海容早前退出後，今日(31日)再有核心成員黃梓謙(Gary)宣布退出，即係個半月內有三人離巢，可見唔少人決定離棄臭史多多嘅湯家驊，可謂眾叛親離。

湯家驊喺2015年成立聲稱走中間路線嘅民主思路，但成立以嚟一直冇乜特別政績，反而喺唔同時期都有成員決定退出，最多只係有醫管局新界東醫院聯網前總監馮康個女馮海容，加入政府做咗商經局政助。此外，民主思路喺2016年立法會換屆選舉亦曾經派出Gary同麥嘉晉分別出選港島區及新界東選舉，但二人均落敗，及後Gary亦獲府委任公職，現任兒童事務委員會同平等機會委員會成員，而呢三人近來都先後決定退出民主思路。

Gary今日喺社交網站宣布退出民主思路，目前未有打算加入任何政治團體。佢話當初加入民主思路，首要目標係修補當時嘅社會撕裂，推動民主發展，創造社會流動，可惜民主思路暫時未能做到，明白社會對民主思路有不少批評，成員嘅言論與行事作風不時成為眾矢之的，尤其早陣子，親朋好友、網友，以至工作夥伴，皆向佢表達意見，全因大家知道民主思路有行會成員，希望Gary能影響政府決定。

佢又認為貼地準確回應民眾訴求係從政者最基本要求，政治環境複雜，自己人微言輕，轉達嘅意見未能影響政府每個決定，希望政府以實際行動化解政治危機咁話。似乎暗批湯家驊言論備受批評喎。

老實講，湯家驊近日喺修訂《逃犯條例》風波上言論備受批評，更被點名要求辭任行會。再加上佢臭史甚多，2011年被踢爆其位於大埔康樂園嘅豪宅單位涉嫌僭建玻璃屋，佢當時一度引用自己有份打過嘅僭建官司，死撐話玻璃屋屬豁免規管類別，之後其他法律界人士及屋宇署就指證出錯，佢先話一時記錯，向公眾致歉及承諾清拆僭建物，真係?到爆。

2015年喺立法會未能通過政改方案後，佢退出公民黨並辭任立法會議員，之後成立民主思路，至前年現屆政府上場被委任為行會成員，成為建制一分子，有人稱佢為「政界變色龍」。

講真嗰句，湯家驊臭史多、失言又多，加上今次修訂《逃犯條例》搞到一鑊粥咁，身邊啲人離棄佢都不足為奇吖！