政Whats噏：退休之日遇8號波　梁栢賢想開波？

梁栢賢(PY)尋日(7月31日)正式卸任醫院管理局行政總裁，之但係佢離開呢個戰場，又即刻走入另一個戰場，仲將會激戰連場添！到底咩事，佢唔係話退休咩？

PY尋日退休，咁啱熱帶風暴「韋帕」襲港掛8號波，佢喺Facebook貼文話「退休係時候開波啦！」離開咗醫管局仲同邊個開波？跟住睇到張相，見佢孭住袋波，真係好多波，仲係唔同嘅波，包括籃球、足球同羽毛球，原來佢講嘅開波，係打波呀！

呢個貼文出街後，有網友一度以為同「韋帕」扯上關係：「係咪8號波？」另有網友話「今日未落波，唔可以開波啦！」亦有唔少網友相約佢打番場較量下，有網友更話「乜球都啱你喎，多才多藝！管理好身體健康，享受黃金歲月。」

老實講，PY早前喺Fb都話過往一段時間去一啲足球賽，都係做開球禮，好少落場踢波，又話退休後希望多啲落場踢，依家咁多網友約佢打波，睇怕佢都要操番一輪備戰嘞！