政Whats噏：辦事處受破壞　梁美芬話嚇親老街坊

《逃犯條例》修訂風波蔓延全港各區，其中各建制派議員辦事處亦成為示威者攻擊目標，好似立法會議員梁美芬嘅石硤尾辦事處，就喺尋日(5日)嘅示威中遭殃，門牌上「梁美芬」三字被噴上黑漆，只係得返「立法會議員辦事處」八字，搞到梁要同職員一齊拎起水喉、地拖清潔，佢斥責示威者搞到佢要「use water」同「waste water」！

梁喺自己Facebook形容石硤尾辦事處唔止屬於佢一個嘅，係屬於石硤尾的街坊，事關平時有好多街坊鍾意喺度閒談傾偈，結果今次辦事處被破壞，受影響嘅唔止佢本人，仲有經常喺佢辦事處流連嘅街坊，仲話其中一個年屆98歲嘅老街坊因為咁而嚇親添啊！

梁話示威者成日稱要「be water」，結果今次係要「use water」同「waste water」，暗批示威者搞破壞，搞到佢要浪費用水去做清潔咁話。