每日一片：撞車似篤波　私家車倒轉行完美「入袋」

雖然撞車並不是一件好事，不過有時撞車過程，確實充滿可觀性。近日網上流傳一段車Cam片，兩架私家車在山路狂撼後，其中一架竟趣怪地後褪彈入一個泊車位，由於動作流暢，有網民笑稱似足花式桌球。

現場是荃錦公路近川龍，事發於昨日(7日)約傍晚6時，由車Cam片所見，當時一架黑色私家車沿荃錦公路右轉準備駛入一條斜路小路，卻未發現一架紅色迷你私家車正從小路駛出，結果車頭猛撼紅車車身。衝力下，紅車打了一個180度白鴿轉，再後退橫跨兩條行車線，轉入一個停車場泊車位，直至撞到另一部銀色私家車才停下，期間紅車半邊車身彈起，姿勢非常趣怪。至於黑色私家車在撞擊後，車頭亦嚴重損毀。

網民看過片段後，形容撞擊情況如「篤波」，「簡直係完美入洞」、「勁，落西打尾袋」，有人認為撞車過程趣怪，「咁樣炒又幾有新意喎」，「好野，咁嘅意外，真是整定」。亦有網民指紅色及銀車非常無辜，「架黑色車賠足兩架車」。