政Whats噏：食髓知味　眾志醞釀搞九月罷課

反修例嘅遊行示威持續兩個月未見平息，早前由政黨轉型為民間團體嘅香港眾志(眾志)近日喺社交網站稱，會聯同中學生反修例關注組及青年反修例關注組，一同組成「中學生罷課籌備平台」(「籌備平台」)。換言之，眾志又醞釀於九月開學嘅時間號召罷課「玩鋪勁」，呢個真係令人回想二○一四年違法佔領行動前夕，當年統稱「雙學」嘅學聯及學民思潮亦曾發起罷課，當時嘅旗手巧合地亦有份醞釀今次罷課，分別係眾志秘書長黃之鋒及前主席羅冠聰，值得留意嘅係，前者已走上社運之路，後者一度連議員都做過，莫非有人一諗唔到有乜新搞作，就要翻炒罷課呢條橋？

五年前違法佔中爆發前夕，先有學聯發起於金鐘政府總部一帶進行大專生罷課，繼而有學民思潮發起中學生罷課一天參加集會，時任學民思潮召集人黃之鋒當時有份號召重奪俗稱「公民廣場」嘅政總東翼前地，最終不但令自己惹來官非，更變相促成佔中三子提早啟動佔中，事有湊巧，當年嘅雙學代表黃之鋒及羅冠聰，現時同為眾志核心成員，疑似再次聯想醞釀新一波罷課行動。

五年後嘅今日，反修例爭議六月爆發至今仍未見平息，眾志喺社交網站宣布會同其他組織籌備平台搞九月罷課，唔通係想搞五年前九月罷課翻版？翻查資料顯示，今次修訂《逃犯條例》風波喺六月爆發時，教育界亦曾發起罷課，而眾志成員其時亦曾喺港鐵站呼籲外界響應，不過，當時正值暑假前夕因而搞唔起，然而此一時彼一時，九月係開學嘅日子，有意見分析適逢依家政治熱度再度升溫，眾志疑翻炒舊橋都隨時可收到意想不到嘅效果。

對於眾志疑想連結多方搞罷課嘅如意算盤，最大阻力可能係今次反修例爭議主催「無大台」，眾志等成立嘅「籌備平台」嘅網上問卷就罷課呢個議題展開「摸底」，問題包括罷課開展日期、罷課維持多久、罷課行動形式等議題，有關問題開宗明義聲稱係收集中學生意見，同時又「帶頭盔」強調會秉持今次運動「自發自主嘅原則」，盡力為罷課同學提供一切所需支持，稱要有足夠人數才能發起有威力嘅罷課。

不過，有網民就喺社交網站留言話「小心眾志想立大台」，憂慮會摧毀依家嘅「無大台」文化，質疑眾志會否利用此機會排除他黨，甚或引發非建制內訌，有人更戲謔「成也之鋒，敗也之鋒」。查實，依家已經係二○一九年，黃之鋒都已經係成年人，羅冠聰更一度成為史上最年輕議員，加上一眾示威者過去一段時間抗爭行動，「快閃」又得，隨時「轉場」又得，係咪繼續要聽命於有知名度嘅泛民政界人士指指點點，相信大家對此都心中有數嘞！