政Whats噏：畀人鬧完　漢奸黎又密會李漢奸等

反修訂《逃犯條例》風波持續不斷，亂局至今仲未平息，壹傳媒黎智英(漢奸黎)近日被內地官媒指，與疑為亂港幕後黑手嘅美國國家民主基金會(National Endowment for Democracy，NED)關係密切，又被批評與美國高官會面，遭國務院港澳辦警告「玩火者必自焚」。呢頭被人鬧完，漢奸黎嗰頭又與同屬「搞事四人幫」、有「李漢奸」之稱嘅民主黨(白鴿黨)創黨主席李柱銘等老嫩鴿喺何文田寓所，再度密會攪局，係七日內第二次。唔通又想諗計喺反修例事件搞亂檔？

漢奸黎、李漢奸、違法佔領行動(佔中案)被判囚八個月獲緩刑兩年嘅前主席李永達(高達)同外號「AV仁」嘅前主席何俊仁，四人繼上個周六(3日)喺中環一所意大利餐廳密會後，尋晚喺漢奸黎寓所再度密會，今次仲有白鴿黨立法會議員林卓廷。尋日下午約5點50分，漢奸黎嘅七人車載住李漢奸、高達、AV仁同林卓廷抵達漢奸黎位於何文田嘅寓所。

密會約三個小時後，至晚上近9時，漢奸黎嘅七人車就接載李漢奸、高達、AV仁同林卓廷離去，幾分鐘後，高達同林卓廷就喺旺角警署落車，七人車繼而送李漢奸同AV仁離開。林卓廷離開時，右手仍有護托包住，未知傷勢係咪同近日喺元朗遇襲中受傷有關。

漢奸黎同民主派就反修訂《逃犯條例》大合奏，喺多次反修例遊行中，漢奸黎更排喺隊頭，扮晒總指揮，近日反修例示威衝擊不斷升級，次數變得頻密，咁啱示威者用嘅武力程度亦持續上升，情況一次比一次混亂。咁啱今日（11日）分別喺港島東同深水埗再發起遊行，漢奸黎此前同咁多白鴿黨成員再攪局，唔知係咪又想諗計搞亂檔呢？