政Whats噏：黃偉綸大假拆開兩截　耐人尋味

暑假向來都係好多高官放假嘅熱門日子，今年暑假已經不經不覺過咗一大半，目前仲放緊大假嘅發展局局長黃偉綸，原來假期拆開兩截嚟放，喺星期一會復工一日，之後再放多八日假。放放下假，突然中間返一日工，唔通呢日有咩重要事情公布，要佢親自處理？

政府憲報公布，黃偉綸由上個月廿七日開始放假，期間由副局長廖振新署理局長職務，所以近期發展局參與嘅活動都見唔到黃偉綸蒲頭，但佢放左兩個幾星期假之後，返一日工後再放假，去到本月廿一日才再次返工。加加埋埋，即係放三個多星期暑假，都唔少架，不過到底星期一有乜嘢咁重要，搞到佢一定要番工呢？認真耐人尋味！

香港社會喺呢兩個多月以來都陷入困局，幾乎每個禮拜都有遊行示威演變而成嘅警民衝突，情況實在令人擔憂，政府都話想盡快聚焦喺民生議題，尤其土地房屋嚴重缺乏，更加係民怨所在，黃偉綸呢個時候放咁多日假，到底係已經諗到解決方法，所以安心放假，定係既然無方法解決，所以不如放假懶理呢？真係不得而知嘞！