政Whats噏：陳家珮囝囝玩人體藝術　咀仔同手仔都係唇膏痕

小朋友愛發揮無窮創意，發掘新事物係佢哋成長必經階段，但都有可能製造唔少麻煩，最後要父母出手解決，新民黨南區區議員陳家珮(Judy)就係其中一位出手家長。

話說Judy尋日(11日)朝早喺社交網站貼文同上載相片，見佢2歲幾嘅囝囝拎咗佢支唇膏，畫到咀同雙臂都係紅色唇膏痕，有網友仲留言話佢囝囝玩人體藝術呀！Judy就好肉痛咁話，雖然支唇膏仲用得，但已經無咗一大截，事後佢要拎樽卸妝油，用咗5分鐘幫囝囝清潔。

Judy透露，支唇膏280蚊，而且佢不嬲都用開呢款，呢次只係放低咗喺洗手間，結果就畀囝囝拎走左。佢話囝囝已經唔係第一次拎佢啲化妝品嚟玩，以前都試過用眼影畫到成面都係鬍鬚，但就無今次咁誇張。

佢又話今次算好好彩，因為囝囝無畫到周圍都係，仲話最緊要畀小朋友發揮下創意，所以佢亦都會廢物利用，畀啲紙箱囝囝畫。