政Whats噏:林超英忘了曾教岑智明「講人話」

20190822
東網電視
更多新聞短片
岑智明緊記前輩教誨要「講人話」。(互聯網)
「講人話」呢句話最近變咗唔少人嘅金句,天文台台長岑智明喺社交網站透露,日前出席社福界一個活動分享時,主持人要求佢用呢句話嚟做開場白。唔講唔知,原來呢句係出自佢恩師、天文台前台長林超英,但最有趣嘅係,竟然林超英都話唔記得有講過。
其實岑智明舊年喺電台節目都有講過,話林超英早喺十幾年前即將退休,同佢出去開會,回程時已同佢講要學識「講人話」。但林喺岑嘅網頁就留言話「受寵若驚」,主要係「驚」,話唔記得自己講過「講人話」,岑回覆時仲重提當年往事,林又再留言「又似係」,話相信岑嘅講法。
岑智明將呢句話銘記於心,尤其天文台喺社交媒體同市民溝通,「貼地」、「互動」、「講人話」的確非常重要。佢估唔到呢句說話今日竟然會變咗城中熱話。
有眼利嘅網友留意到本來一頭白髮嘅佢,當日出席活動染咗黑髮,留言「岺台長你好似染咗黑髮喎」,佢嘅回應係畀咗「哈哈笑」,染咗髮嘅佢睇落都後生咗唔少喎。