政Whats噏：家居意外整傷腳趾　葉傲冬要踢拖示人

相信唔少人都感受過乜嘢叫十指痛歸心，行路撞親腳趾更加係常見情況，油尖旺區議會主席葉傲冬近排都親身感受呢種痛楚，更搞到要長期踢拖示人添。

葉傲冬話腳傷係因家居意外造成，唔知係咪心神恍惚，當日開門時就踢咗落去搞到即場流血，紥咗大半日仍然又紅又腫，問過朋友後就話似骨裂，直言只有將腳趾固定呢個方法可以做。

自從腳趾受傷，葉傲冬大部分時間都係踢拖見人，笑指街坊都睇慣新造型，但早前出席一定要着鞋嘅場合，只係着咗半日就痛到頂唔順，所以依家唔敢着鞋住，要繼續踢拖一段時間。

不過，向來熱愛健身嘅佢無放棄興趣，仲話已經同健身教練商討只集中訓練上半身，而下半身只係一段短時間無得練，相信唔會影響到健身成效。