政Whats噏：觀塘衝突過後　何啟明先去搬磚？

前日(24日)觀塘有示威遊行，部分人偏離遊行路線行咗去九龍灣，仲演變成衝突，期間示威者又掟磚，又拆欄杆，有啲人仲鋸咗個燈柱落嚟。事隔一日，身兼觀塘區議員嘅立法會議員何啟明翌日(25日)竟然仲落去搬磚？

係就係搬磚，不過今次佢係幫手執返乾淨條馬路，唔係拎嚟掟。佢喺社交平台上傳咗幾張相，係同一眾義工去九龍灣清理街道，幫手清理磚頭、告示牌、欄杆等障礙物，話係想恢復原社區原貌。

何啟明話落區之前，政府已經清理咗現場大部分嘅障礙物，但仲有唔少磚留喺馬路上面，由於嗰條街車速可達70公里，若果有車輾過磚頭同雜物，好易反車，亦可能捲起磚頭飛向途人，好危險，所以就落街將啲磚頭同雜物執返上行人路，佢仲幫手將欄杆同告示牌用索帶紮起，方便食環署日後處理。