政Whats噏：鍾樹根撇低老婆　獨自去偷歡

好多政界人士退下火線之後，都會爭取更多時間享天倫樂。原以為最近添咗孫女嘅立法會前議員鍾樹根都會好享受湊孫樂，點知佢竟然撇低老婆獨自去偷歡。

話說樹根喺Facebook上載咗幾張相，見佢剪咗一頭靚髮，背後仲有一班靚女，仲話今晚睇靚女添！有網友即時留語話「眼看手勿動」，仲有網友直指「你曳曳啦！有無帶埋事頭婆去？」提到事頭婆，樹根一啲都唔驚，仲話「拒絕她監管！」真大膽。

其實嗰晚係2019亞洲太平洋國際小姐選舉，大會邀請咗好多城中名人做評審同頒獎嘉賓，而樹根都係被邀之列。咁即係攞正牌睇靚女囉！

雖然樹根冇做議員，但好多人仍然想佢重出江湖，好似日前佢喺Facebook留言話有時間都歎下普洱同整下盆景，有網民就提起近排社會動盪，佢即刻話：「只談風月」。睇嚟佢真係唔想再捲入政治是非喎。