政Whats噏：張秀賢被聯署反「暴大」？

近月反對修訂《逃犯條例》示威搞到滿城風雨，無論咩政見都有人發起聯署。近日就有班中文大學校友聯署，批評近日中大學生支持罷課、豎立雕像係鼓吹暴力，不過喺聯署名單中，就出現咗中大前學生會會長張秀賢的名字。明明喺周一(2日)嘅罷課集會上，張秀賢仲有發言支持，事隔兩日就聯署反對，乜嘢驅使佢轉軚轉得咁快呢？

話說張秀賢今日喺Facebook上擺咗份聯署，話有人喺份中大校友聯署上見到佢個名。同時佢仲利益申報埋，話簽名唔係佢，仲話可能聯署嗰位「張秀賢」係女人添。

張秀賢回應查詢時話其實聯署嘅唔係佢嚟，而係一位同樣叫「張秀賢」嘅師姐嚟。佢仲話，睇到嗰時都以為自己精神分裂，因為一邊撐罷課，一邊就聯署反對。至於被聯署，佢就話尊重師姐嘅聯署自由，仲叫大家唔好認錯人。其實香港有成700萬人，好多時都會出現同名同姓，被認錯都唔出奇嘅！