政Whats噏：陳帆落區聽意見　柯仔爆佢畀女圍

近期示威不休，被批評不作為嘅政府日前終有所行動，話官員會走入社區同市民對話。運輸及房屋局局長陳帆似乎最聽話，今日(6日)就走入觀塘，更被身兼觀塘區議員嘅立法會議員柯創盛(柯仔)大爆畀女圍，陳帆唔通真係咁艷福無邊同受歡迎？

柯仔今日連同多名觀塘區議員捉陳帆落區，希望直接向佢反映當區嘅議題，而且行程相當緊密，去咗彩福邨同寶達邨等7個地點，睇嚟真係有唔少地區問題等住陳帆跟進。

柯仔更大爆，陳帆落區期間畀女圍，真係睇唔出陳帆咁有異性緣喎！不過所講嘅其實係一班婆婆街坊，搵陳帆集郵之餘，更把握機會直接反映意見。不過陳帆全程都將條呔收入恤衫袋中，其實收埋條呔又唔會涼爽啲，到底點解要收埋呢？真係令人費解嘞！

講真嗰句，官員多落區，不再離地實屬好事，但如果只見長者，而見唔到對政府最為不滿嘅一群，聽到嘅意見就點都唔夠全面，唔通政府所謂嘅走入社區對話，就僅止於此？