政Whats噏:鄧以海率海關 為癌童籌得220萬元

20190907
東網電視
更多新聞短片
鄧以海(後排中)與一班小朋友合照。
海關關員要有一定嘅體能要求,原來連羽毛球水準都有返咁上下。今日(7日)海關關長鄧以海就率領海關羽毛球代表隊,為非牟利兒童癌病互助組織「生命小戰士會」籌款,成功籌得逾220萬港元,成績相當唔錯。
今日多個政府部門同機構一齊落場比併羽毛球技,今次其實係海關大搞慈善羽毛球錦標賽,一共有12支隊伍參加,就連入境處都組隊參賽,多名政府官員包括入境處處長曾國衞、海關副關長何珮珊、食物及衞生局局長陳肇始及副局長徐德義、保安局副局長區志光等都有份出席,其中何珮珊、徐德義同區志光等人仲喺開幕式上主持亮燈儀式添。
最終海關同入境處分別奪得「獎盃賽」嘅亞軍同季軍,成績絕對唔失禮。鄧以海就話,今年海關成立110周年,所以特別構思同慈善機構合作搞籌款活動,而海關未來會繼續為國家同香港嘅繁榮穩定作貢獻,仲會繼續參與公益活動。齋睇今次呢個比賽都知海關講得出,做得到喇。