政Whats噏：羅范死撐少女免費性愛非假　區議員嘲冇腦

話說行政會議成員、教育局前局長羅范椒芬日前喺電台節目中，聲稱有證據證明示威者有誘因上前線，因為年輕女性受誤導，而向示威者提供免費性愛嘅言論，被網友鬧爆後，有內地官媒今日(10日)報道，羅范再三強調有關事件並非虛假。睇嚟佢仲係死撐冇講錯喎。

有內地官媒報道，羅范喺電台講完嗰番言論後，該內地官媒發現與網上流傳嘅信件為同一件事，羅范三次向該內地官媒強調呢件事係真實嘅，亦已被佢認識嘅當事人嘅朋友所證實，仲強調呢件事唔係虛假嘅消息添！

話時話，佢呢番言論已惹起爭議，被好多網民鬧爆，唔少人要求佢收回有關言論，而油尖旺區議員余德寶仲喺Facebook貼文，話「我朋友個朋友個朋友個朋友話我去咗大台拍電視劇：開心速遞嘅Terry！」跟住佢反駁有冇fact-check呀？仲批評羅范係冇腦嘅人。

其實，喺余德寶嘅貼文出街後，有網友留言話：「真心似Terry」，另有網友話：「原來我唔係第一個話你似Terry，笑死」。