政Whats噏：高拔陞上任　即要備戰流感高峰

醫院管理局行政總裁高拔陞上任就要「打仗」，講緊係打流感高峰期呢場仗！佢上任後今日(13日)首次同傳媒茶敍，提到醫管局已經未雨綢繆，密鑼緊鼓籌備冬季流感高峰期的應對措施，包括較早前已經撥款7億港元畀各聯網準備措施應對，又增加逾500張病床。佢又談到新任醫管局主席范鴻齡，雖然范對臨床醫療工作認識真係唔深，高認為可以同新主席互補位咁話。

醫管局早前公布由范鴻齡接替梁智仁成為醫管局新主席，高拔陞話梁教授本身是醫生，當然對臨床工作十分熟悉，范是行外人，但可以為醫管局帶來更多不同人脈聯繫。高拔陞又講起畢業第一份工就做醫管局醫生，好處係熟悉臨床運作，但關於策略性嘅人脈或想法，就要靠其他人帶入醫管局。

被問到反修例事件中，前線醫護人員應唔應該表達個人訴求。高拔陞認為香港是包容的社會，醫管局亦一樣，但提醒前線要保持「一視同仁」嘅專業原則，不同背景病人都應得到適切治療。