政Whats噏：退休後遊東京　梁栢賢被讚後生咗

醫院管理局前行政總裁梁栢賢(PY)退休後都好少公開露面，事隔個半月，近日竟然現身東京，原來佢去咗當地嘅新打卡勝地teamLab Borderless。

PY喺7月底退休，之前曾經講過退休後會環遊世界，果然坐言起行。佢日前喺Facebook上載咗短片，見佢企咗喺度，海浪燈影就不停咁映上佢身上，恍如置身波濤之中，而睇佢嘅笑容都真係好enjoy。呢段片冇聲㗎，唔知係咪想話一切盡在不言中抑或係無聲勝有聲呢？

唔少網友睇到呢段短片都紛紛留言，話「感覺好輕飄飄」、「踏浪而來」，有網友仲有啲寓意咁話「乘風破波之後，旅途愉快」，另有網友就讚佢又年輕咗同神采飛揚添！

PY去打卡嘅teamLab Borderless美術館喺舊年6月開幕，館內嘅電腦同投影機，令人置身喺一個純數碼世界當中，仲會喺唔同嘅展示場面互動。