政Whats噏：馮程領導創新辦多災多難　副總監陳羿裸辭

由特首林鄭月娥一手創立的政策創新與統籌辦事處(創新辦)成立約一年半以來，由馮程淑儀出任總監，自此都新聞多多，可謂多災多難。最新一單就係副總監陳羿(Donald)上月底已經請辭「跳船」。Donald回覆查詢時證實已經辭職，稱並非被挖角或與本屆政府不和，至今仍未有任何新工作安排。此外，創新辦成立至今，另有6人已經請辭添，睇嚟政府工真係唔多好做，搞到大家都要跳船走。

去年4月成立嘅創新辦，前身係中央政策組，由林鄭上任後一手創立，主要工作係為特首及相關政策局提供政策支援，又會協助施政報告工作，被外界指係「影子政務司司長辦公室」。

馮程出任創新辦總監後，其丈夫、前經濟發展及勞工局副秘書長馮永業被裁定公職人員行為失當罪成判囚。至於馮程本身亦署任首長級甲一級政務官(D8)多年，仍未升正，可見創新辦真係新聞多多。

政府現時仍希望喺下月中公布施政報告，而施政報告一向係創新辦主要工作之一，點樣解決土地房屋短缺問題，更加係重中之重。喺呢個時候，3個副總監之一嘅Donald證實上月已提出請辭，暫定年底正式離職。有指Donald過往喺創新辦，正正係主要負責運輸及房屋嘅研究。

Donald於1994年加入政府，曾先後在多個決策局及部門工作，曾任特首辦助理處長、勞工及福利局副秘書長，現時係首長級乙級政務官(D3)，月薪達21萬港元。截至今年6月底，D3或以上嘅政務官只有120多個，而陳羿現時只有47歲，一直被視為「AO(政務主任)界」明日之星。有指Donald否認傳聞指他會轉到港鐵，頂替已辭職的公司事務總監蘇家碧職位，只稱希望轉換環境，思考係咪一世留喺政府，並希望發展第二事業。

Donald回覆查詢時，證實已經喺上月底請辭，強調並非被挖角或與本屆政府不和，至今仍未有任何新工作安排，年底正式離任後，會休息幾個月，又戲稱多謝傳媒報道佢離任消息，省卻佢搵工嘅麻煩咁話。

其實，佢並非創新辦唯一離任嘅人員，創新辦成立短短約一年半，已有多名職員離任。創新辦回覆指，成立至今，共有6人已請辭，包括2名高級政策及項目統籌主任，同埋4名政策及項目統籌主任。計埋Donald，即係足足有7人跳船，創新辦呢份工似乎都唔多吸引呀吓！