政Whats噏：葉劉戴黑超行街市　自讚夠型又防曬

立法會議員葉劉淑儀今日(21日)喺社交網站分享事隔3個多月後再去上水石湖墟街市嘅情況，記得今年5月，佢喺同一個地點巧遇立法會議員黃國健(KK)買餸煲湯，今次舊地重遊，雖然無緣再遇KK，但依然有亮點，就係佢連行街市都戴住副黑超囉。

葉劉話，戴黑超係因為好曬同夠型，睇番當日照片，葉劉的確唔止視察位於室內嘅街市，仲同黨友行到戶外視察水貨活動。睇嚟葉劉真係好注重雙眼健康，有避免雙眼受猛烈陽光照射噃。

其實葉劉當年擔任保安局局長，已經成日戴住黑超出席唔同場合，黑超可以話係佢嘅標誌之一。雖然當年嘅黑超造型換來負評，但佢就解釋話雙眼接觸陽光會流眼水。