政Whats噏：經濟太差　港珠澳大橋救唔到美食車

由上屆政府推動嘅「前朝遺物」美食車先導計劃被批評愈做愈縮水，部分美食車更暫時「停車」止蝕。政府喺上月原本新增咗港珠澳大橋香港口岸旅檢大樓作為美食車新營運地點，原本希望趁大家貪新鮮使用大橋會有多啲旅客幫襯美食車，點知聽聞完全起唔到救亡作用，皆因只得一間營運商申請營運五日，其他營運商完全冇申請，新增地點真係有等如冇喇。

有知情人士話，出現呢個情況唔可以怪港珠澳大橋唔吸引，只係大橋「生不逢時」，因為其他美食車營運點亦都冇乜營運商競爭，就以本月中嘅周六同周日(14日及15日)為例，有美食車去做生意嘅營運地點就只有兩個主題樂園，合共都係得三個營運商咋，認真慘情。

其實唔止美食車嘅反應慘淡，整體經濟亦都唔多好，政府一早有預警，財政司司長陳茂波近來亦都喺網誌大爆八月暑假旅遊旺季，訪港旅客比去年同期減少近四成，可想而知香港整體旅遊業狀況有幾差。唔少人都估計，旅遊業差、經濟亦會差，依家只係啱啱開始，真係唔知要捱幾耐喇。