政Whats噏：陳志豪一家被起底　憂兒子安全會報警

香港近月出現前所未見嘅示威浪潮，社會撕裂，很多人因政見不同而慘被起底，好似香港廣西社團總會副會長陳志豪(Victor)就成為受害者，一家都被起底，佢好擔心囝囝安全受威脅，明日(25日)會去報警同埋通報個人資料私隱專員公署。

Victor話自己並非首次被起底，過去不時收到滋擾電話，只係近月幾乎日日有，仲試過凌晨電話響無人出聲添。

不過，起底情況喺周末惡化變成禍及妻兒，佢發現網上出現太太同3歲半嘅囝囝資料，連全家福都有埋。佢本身都諗住無乜特別，點知尋日(23日)收到電話提醒佢要接囝囝放學，對方更自稱為學校老師，又講得出囝囝全名，但由於未到放學時間而覺得奇怪，事後學校亦表示無老師搵過佢，所以就聯想到事件與起底有關，佢已經提醒學校唔好畀陌生人接走囝囝，安全至上。