政Whats噏：民主阿婆又說三道四　被轟居心叵測

被內地官媒點名炮轟為「叛國禍港四人幫」之一嘅「民主阿婆」、前政務司司長陳方安生，之前頻頻訪美「唱衰香港」，早前又喺灣仔街頭被市民當街爆粗鬧佢係漢奸、賣國賊，但佢好似唔知驚，今日(25日)又就違法佔領行動(佔中)5周年發表聲明說三道四，對政府做法指指點點，話暴力解決唔到問題。有時事評論員就炮轟佢居心叵測、火上加油。

民主阿婆喺聲明提到，政府絲毫冇吸取5年前「佔中」嘅教訓，政改毫無寸進，又強行推出修訂逃犯移交條例，爆發民憤，佢又提到近3個月嚟嘅暴力衝突，話社會到咗十分危險關頭，但就話暴力解決唔到問題，只會帶嚟更加多仇恨，政治問題需要政治解決，呼籲大家冷靜處理。

時事評論員陳雲生指，暴力衝突已經3個月，民主阿婆今時今日先出嚟講停止暴力係太遲，質疑佢「刷存在感」，話冇可能之前唔知會發展成依家呢個情況，呢番說話可能會引發更多人出嚟遊行。陳雲生解釋，民主阿婆做咩都有居心，估計今次想「放風」試吓水溫，測試政府反應，睇吓政府仲有咩牌就真！