政Whats噏：社會產生深層次問題　王于漸話同投胎有關

反修例示威絲毫冇冷卻迹象，有人歸咎源於社會有深層次問題，即係房屋，但香港大學首席副校長王于漸有另類看法，仲大談投胎問題喎。

王于漸尋日(25日)出席一個午餐會講房屋政策，話香港要解決嘅並唔係房屋問題而係貧富懸殊，因為房屋問題係貧富懸殊其中一個象徵，所以要解決嘅係貧富懸殊，直言現時貧窮家庭無法上流，房屋階梯亦斷咗，佢大潑冷水話問題無得解決，因為揀錯老竇投胎無咗希望喎。

唔單止咁，佢話仲有另一個老竇，就係政府，但要唔要呢個老竇就唔知喇，事關每個周末、每個晚上打開電視都知喎。一聽就知佢講緊近期示威活動喇，佢就叫政府要做返個老竇，提供高跟鞋畀人企上呢條階梯，之後就可以用房屋紓緩貧富懸殊問題，直言一味搵地建屋唔能夠解決，因為現時問題並非在於房屋供應量少而係無錢喇。