政Whats噏:蘇偉文搞過渡屋研討會 議員潑冷水

2019年09月30日 17:40
東網電視
更多新聞短片
蘇偉文搞過渡性房屋研討會被潑冷水。
運輸及房屋局副局長蘇偉文邀請全體議員喺11月頭去開「同行.共創 過渡性房屋」研討會,但有議員就話對研討會期望唔大,本身7月話批20億港元去起過渡性房屋,點知開唔成會,到依家先嚟搞首次研討會,都唔知要傾到幾時,睇怕要下年4月先會批到錢㗎啦!
立法會房屋事務委員會主席柯創盛話本身希望3年內可以起到1萬個過渡性房屋單位,但依家連起5000個都做唔到,認為進度太慢。佢覺得政府應該壓縮行政程序,做好啲前期工作,預先搵定心儀地皮,早啲做好配對咪可以直接拎錢囉!佢又話政府要由一個「促進者」變成「倡議者」,主動啲,好似當年起石硤尾臨時房屋咁。佢仲話希望有更高級嘅官員嚟同佢哋開會,特首既然都話房屋問題係「重中之重」,就最好派埋司長落嚟,咁先表現到解決問題嘅決心㗎嘛!
副主席尹兆堅直言對研討會無太大期望,覺得都係一個「吹水會」,因為過渡性房屋嘅方向已經好清晰,係欠政府承擔番責任,拎番個主導權去收番啲丟空咗嘅土地。佢又話依家先嚟開第一次研討會,之後應該仲有兩三個。佢估計應該要到下年3、4月,成年後先會批到撥款,又話政府淨係得把口講點樣重視房屋問題,但個個部門都山頭主義,根本唔將房屋荒擺喺第一位。