政Whats噏:民主阿婆又赴美國唱衰香港 被斥亂噏不知恥

20191003
東網電視
更多新聞短片
舊電池陳方安生又去美國唱衰香港。(設計圖片)
被內地官媒點名炮轟為「叛國禍港四人幫」之一嘅民主阿婆、前政務司司長陳方安生仲唔知死,日前又去美國唱衰香港,批評港府撤回修訂《逃犯條例》講得太遲,回應訴求亦太少,反而惹起更多反修例嘅暴力衝突。有時事評論員怒轟民主阿婆講一套做一套,仲話示威者咁暴力明明係民主阿婆有份煽動,叫呢個舊電池咪再指指點點。
民主阿婆去咗美國史丹福大學演講,同外國學生講香港亂象,仲對中央同特區政府指指點點。佢由盤古初開講起,話中央對香港嘅干預愈嚟愈多,搞到香港無晒自由,亦都影響咗特區政府嘅決策。
講到持續咗近四個月嘅反修例暴力衝突,佢批評特區政府撤回修例撤得太遲,又話年輕人提出嘅五大訴求,特區政府回應得太少,話政府提出撤回修例後,社會上出現嘅暴力衝突更多,而以依家嘅情況,佢希望呢啲暴力衝突可以停止。
數完特區政府,佢又教中央點做嘢,話中央應該要信任多啲香港人,畀香港人高度自治,同時應該更了解香港年輕人嘅聲音同諗法先得。
時事評論員陳雲生直指香港回歸後嘅民主程度無變過,又話雖然依家警方有時唔批不反對通知書畀遊行主辦單位,但啲人都照出嚟遊行,只要啲人無做越軌行為,警方都好容忍。
佢又話其實好多人都想中央政府幫香港平亂,但中央政府都無指示香港政府做乜嘢,直斥民主阿婆根本亂噏,講一套做一套,因為明明示威者嘅暴力,佢係有份煽動嘅,民主阿婆應該同示威者講唔好再咁暴力先啱。
老實講,民主阿婆過往經常外訪唱衰香港,更被內地官媒點名怒轟係「叛國禍港四人幫」之一,而早前佢喺灣仔街頭更被市民兜口兜面舉牌,鬧佢係漢奸、走狗,仲鬧佢唔應該去美國唱衰香港添!之但係佢依然繼續去唱衰,恬不知恥。不過,佢之前都呼籲過要停止暴力,10月1日咪又係打到開花,咁就證明呢舊舊電池過晒氣嘞!