政Whats噏:用鎖匙隱喻現況? 林正財指香港缺乏信任

20191006
東網電視
更多新聞短片
林正財稱香港缺乏信任。
反修例嘅激烈衝突持續近4個月未平息,社會嚴重撕裂,市民同政府失去互信,而喺西班牙訪問嘅行政會議成員兼老安事務委員會主席林正財,日前就喺Facebook上載咗張相,話相中係長者掛埋一齊嘅鎖匙,但喺香港就從來冇做到,因為欠缺「信任」,呢句說話似係意有所指喎。
林正財經常外訪,睇吓當地有乜嘢新嘅長者安老服務畀香港借鏡,而近日佢去咗西班牙,連日嚟都喺Facebook講下自己行蹤,而日前佢就去咗西班牙第三大城市巴倫西亞,兼且上載咗張相,佢話相中喺客戶服務中心集中咗嘅逾千條鎖匙,主要係為咗長者安全嘅,仲話呢樣嘢喺香港從未做過,事關香港缺乏咗一項重要嘅元素,就係「信任」。
雖然寥寥數句,但已經觸動好多網友神經,尤其係「信任」呢兩個字,究竟林所講嘅「信任」,剩係講長者鎖匙吖,抑或係隱喻香港近幾個月以嚟嘅反修例衝突呢?
有啲網友見到咁多條鎖匙掛喺一齊,都質疑好難搵到一條啱嘅去開門,有網友就直情拉上近日嘅反修例示威集會,事關亦有銀髮族上街遊行,嗰位網友話香港嘅長者戴上口罩當然唔安全,尤其係佢哋覺得不適嘅時候,仲對林有份通過用蒙面法感到羞恥。
唔單止咁,亦有網友直指香港人已全部互相失去信任,政府、警察、地鐵同集團等,問林可唔可以唔好再用強硬手段,而用其他方法呢?亦有網友反問係邊個破壞信任呢?更重要嘅係點樣可以重新建立互信。另有網友就話要雙方一齊建立信任嘅。
其實,政府喺修例事件中,由暫援修例、修例壽終正寢以至撤回修例,再三跪低,但係反修例嘅衝突反而愈爆愈大,早前亦搞過社區對話會話要加強同市民溝通,但係未見有任何成果,到咗前幾日話實施蒙面法,暴力衝突更加一發不可收拾,甚至癱煥咗港鐵,試問仲點樣可以建立信任呢?
林正財一句「信任」後,冇回應網友嘅提問,若果佢真係想拋磚引玉嘅話,咁佢係咪應該拋出一啲實際嘅方法或建議出嚟呢?誠如網友口中,佢係咪解開呢度溝通或者建立信任之門嘅關鍵人物,就要睇佢有冇後續動作嘞!