政Whats噏:市民驚戴口罩犯法 衞生防護中心答非所問

20191010
東網電視
更多新聞短片
黃加慶領導的衞生防護中心亂答市民問題。
禁蒙面法實施將近一個禮拜,好多市民都唔太清楚條法例係點,有好多疑問,又驚平時唔舒服或者避免感染病毒而戴口罩,都變成犯法。有市民就寄咗封Email畀衞生防護中心,問佢哋市民病嘅時候戴口罩會唔會犯法同埋有無法律保障。點知衞生防護中心嘅回覆竟然係點樣「正確使用口罩」,答非所問,離題到爆!
市民署名為「病了的香港。人」,電郵中話有位休班救護員懷疑因為唔舒服喺巴士戴口罩,畀警察用禁蒙面法拘捕。市民就問,衞生防護中心一直都呼籲市民喺病嘅時候戴口罩,咁喺10月5日禁蒙面法生效前,中心有無檢視戴口罩會對市民構成法律風險同有咩保障,如果無檢視嘅話,中心又會唔會撤銷或者更改相關呼籲?
點知衞生防護中心就用佢哋網頁「正確使用口罩」嗰版作回覆,但嗰篇文淨係話戴口罩係預防呼吸道感染嘅其中一個方法,如果戴得啱,可以有效預防由飛沫傳播嘅疾病,之後再補多篇點樣戴口罩。大佬啊,人哋係問戴口罩會唔會犯法,你就叫人學下點樣戴口罩,根本答非所問,都唔知噏乜,衞生防護中心總監黃加慶醫生咁敷衍點得呀!