政Whats噏：屢與陳肇始傳不和　陳凱欣唔認數

立法會議員陳凱欣曾任食物及衞生局政治助理，曾多次傳與其上司、現任食衞局局長陳肇始不和，話佢哋喺局內已經唔啱，所以陳凱欣就走去做議員，一做議員就又針對陳肇始，次次追打食衞局，外人睇落就好似真係水火不容咁。

問返陳凱欣係未真有此事？佢就大嗌冤枉，話呢個傳聞其實傳咗好耐，兩人性格完全唔同，之前喺局內同陳肇始都有分工，好少重疊，例如佢做嘢比較快，同埋對外多，對方就做對內嘅，好似吸煙、乳癌研究，因為各自負責嘅嘢唔同，其實好少有拗撬。

之後由政助轉做議員，第一個問題就關於醫療嘢，有人話佢炮轟陳肇始，佢就澄清話真係只係針對政策，完全冇針對人㗎，只係佢做開宣傳，背景又係傳媒，有時可能會覺得「嘩，咁舊嘅橋」。佢又話，同食衞局前局長高永文都有嘈過，對方仲話佢係頂心杉添，皆因佢覺得唔啱point就會主動講喎。