政Whats噏：辦事處被破壞玻璃牆碎裂　容海恩斥暴徒嚇親居民

過去周末網民發起「18區開花」行動，多區之後演變成衝突，示威者大肆破壞，新民黨位於鰂魚涌、大圍、上水及大埔嘅辦事處都受到惡意破壞，該黨立會議員容海恩(Eunice)位於大埔榮暉商場嘅辦事處亦都被衝擊，佢今日(15日)喺社交網站Facebook上載咗段分半鐘嘅片，同該黨另一位立法會議員葉劉淑儀去現場實地視察吓。

片段見到，辦事處大門成幅玻璃牆碎裂，碎片散布地上，內裏一片凌亂，石頭都飛埋入去，仲見到電視機屏幕都爆埋，辦事處內嘅電腦及保安系統亦要報銷。Eunice之後仲話翻睇閉路電視，見到有8至10名黑衣人聲勢浩蕩咁破壞，而對面正正係補習社，當時又係營業時間，加上辦事處樓上又有人住，呢啲暴力行為會嚇親同危及附近居民，一定要遏止。