政Whats噏：陳健民呻監獄晚餐好難食　事實反而增咗磅？

因違法佔領行動案(佔中案)被判囚16個月嘅「佔中三子」之一陳健民，已於壁屋監獄服刑近半年，而同因佔中案被判囚8個月、月初刑滿出獄嘅立法會社福界議員邵家臻尋日(19日)去探監，指陳仍食唔落獄中晚餐，但體重已回彈3公斤，同入獄時嘅體重冇分別。

邵家臻尋日喺Facebook貼文，話朝早去監獄探過陳健民，指陳入獄後曾減磅3公斤，但依家已回彈，又引述對方話監獄晚餐好難食，仍然食唔落，每晩只食一個橙、一隻雞蛋同兩個麵包就算。

陳健民入獄後教囚友英文，邵家臻話陳仍然開班授徒，依家已經係第二班，每班教4至5個學生，先係會話、後係文法，仲有實習，就係要求學生同外籍囚友對話之後匯報，仲要考試，畢業之後，再開另一班。

邵又話陳係經幾重資訊阻隔後，先知道反修例嘅情況向，亦特別關心「私了」，既明白「私了」嘅前因後果，又怕擦槍走火。