政Whats噏：退會潮出現　吳永嘉退出兩個委員會

立法會委員會選舉正副主席大多塵埃落定，往年建制派「冧友」加入多個委員會，選完正副主席之後，就會陸續退出，工業界議員吳永嘉(Jimmy)今日(21日)就去信退出兩個委員會。睇嚟退會潮開始出現嘞！

Jimmy去信房屋事務委員會同交通事務委員會，指自己因公務繁忙而退出。Jimmy回覆查詢時，否認投完票選主席就退會，佢話係因為自己當選工商事務委員會主席後，覺得香港依家經濟咁差，工商界應該好多嘢忙，所以考慮到實際工作情況，難以兼顧咁多委員會，於是決定退出啦。而退出兩個委員會都係啱啱先決定，仲未知會唔會退埋其他委員會。

其實根據過往經驗，好多議員喺委員會選出正副主席後，都會退出委員會，通常都係聲稱自己太忙而退會，唔知下一位又係邊個呢？