政Whats噏：泛民促交代保安安排　陳維安請食檸檬

過去幾個月示威連場，立法會大樓更成衝擊目標，立法會行政管理委員會期間作出多次唔同級別嘅保安安排，甚至讓警方進入大樓。不過幾位泛民議員就認為秘書處嘅保安安排阻住晒，亦對警方進入大樓有意見，於是去信立法會秘書長陳維安(Kenneth)，要求佢出席明日(25日)嘅內會特別會議提供相關資料。不過Kenneth就請佢哋「食檸檬」，表明唔會提供資料。

話說4名公民黨議員楊岳橋、郭家麒、陳淑莊同譚文豪昨(23日)去信Kenneth，話佢係行管會列席職員，內會正、副主席都係行管會當然委員，而依家內會選緊正、副主席，議員想知道主席人選對保安安排及警員進入立法會嘅取態，所以希望Kenneth出席會議提供資料，等議員投票都有個譜。

陳維安今(24日)回覆話，解釋行管會會議係閉門舉行，討論內容亦都係機密，要得到行管會批准先可以喺內會提供資料。不過因行管會唔批准，所以佢唔可以提供資料，希望議員可以體諒。