政Whats噏:鄺俊宇甩轆 臨急補鑊求入禁蒙面法委員會

20191027
東網電視
更多新聞短片
鄺俊宇今次入唔入得番委員會,都仍然係一個未知之數。
政府用先訂立後審議方式訂立禁蒙面法,立法會之後成立《禁止蒙面規例》小組委員會審議,委員會喺上個禮拜已經開咗第一次會,民主黨(白鴿黨)議員鄺俊宇都有出席,但原來佢當時根本唔係委員。同日,「甩轆」唔記得申請入會佢即刻「補鑊」向小組委員會主席黃定光(象哥)提交逾期申請。但唔知本身佔大多數嘅建制派,會唔會「攔路」唔畀佢入呢?
鄺俊宇嘅逾期申請,按程序要擺上會傾。究竟因乜嘢事一開始唔申請,反而拖到依家呢?佢畀象哥封信就解釋係重整公務工作優次關係,我哋再問番佢,原來一開始有同事幫所有民主派議員申請加入委員會,但偏偏唔記得填佢個名。佢仲話自己唔記得睇番申請名單,都要負責任,依家唯有「補鑊」啦!雖然遲咗申請,但佢話自己人緣應該唔差,加埋上次開會都在場,大家應該都感受到佢嘅誠意。
小組委員會一共有58名委員,當中33個係建制派議員,非建制派就有25人。當問到係唔係因為趕住「冧友」而參加小組委員會,鄺俊宇否認,仲話人哋咁多人,數字懸殊,入埋都唔夠啦!
小組委員會聽日(28日)會召開會議,會點處理呢?主席象哥話,需要睇下鄺俊宇因為乜嘢理由遲咗申請,至於批唔批要睇全體委員意願,並唔係自己獨裁獨斷。佢仲話,如果就個人嘅睇法,佢覺得無論議員係乜嘢派別,只要有意願參加委員會,同事都冇乜理由去阻止,因為議員嘅職責都係開會傾嘢,呢個同時亦都係議員嘅權利嚟。
實際上,逾期申請加入委員會嘅情況一直有出現,先前《國歌條例草案》委員會都出現過「冧友」情況,當時白鴿黨突然「轉軚」,包括鄺俊宇在內等3名議員提出逾期加入委員會,原來鄺俊宇早有前科,但最後都畀佢哋補入。但呢招亦都唔係次次都得,之前工務小組委員會亦曾處理10名議員嘅逾期加入申請,最後淨係得一個人成功補入,所以鄺俊宇今次入唔入到,都仍然係一個未知之數喎。