網民熱話： 司機落斜好失魂　盲舂舂逆線行

雖說香港駕駛考試唔易考，不過一些有牌駕駛者行徑，確實牙煙。昨日(1日)有車Cam就直擊一架私家車在路面無遮無擋下，突然切向對行線逆線落斜，直至在路口遇車迎面而至才「知衰」。其離譜行徑惹來網民側目，質疑司機：「個牌點考返嚟！」

現場是沙田獅子山隧道公路向大圍方向，事發於昨晚約9時40分。由車Cam片段見，當時一架私家車沿獅子山隧道公路左轉落大圍，至紅梅谷燒烤場時，私家車突然打右燈，踩過影線及雙白線，駛至對行線逆線落斜。片段可見，現場路面劃有正確方向箭嘴，但司機卻視若無睹，直至駛至數百米外一個交通燈位，多部車輛迎頭而至，司機才發現出錯，匆匆駛回原來行車線。跟隨其後的網民事後留言稱，「我開頭以為佢想入停車場去燒嘢食，已經狂砵佢，好彩吉人天相」。

司機行徑惹起網民狠批，「真係黐X線」、「呢啲人點解可以唔停牌」、「話畀你知假期就到啦」，「成段路影線同雙白線都可以當單程逆線」，直言司機要「交番個牌出嚟。」