政Whats噏：禁蒙面法公聽會名額　搶手過演唱會飛

反對修訂《逃犯條例》搞到滿城風雨，之後嘅《禁止蒙面規例》(《禁蒙面法》)同樣爭議極大，引起社會上唔少人關注。立法會間中都會就某啲議題舉辦公聽會，藉此等議員同官員可以聆聽公眾意見。話說《禁止蒙面規例》嘅公聽會喺今朝(4日)9點開始報名，聽聞150個名額火速爆滿，睇嚟仲搶手過演唱會飛喎。

公聽會將會喺星期六(9日)舉行，早前立法會就公布咗公聽會嘅資料，名額最多150個，會以先到先得原則去分配。自從立法會公布後，唔少網民就喺網上號召，呼籲市民今朝報名登記，難怪公聽會咁快就滿額啦。

雖然公聽會名額有限，兼且已經滿晒額，不過有興趣發表意見嘅市民都唔使失望，因為仲可以繼續透過立法會網站，向小組委員會提交書面意見。根據立法會網站，市民就《禁蒙面法》提交書面意見嘅截止日期係明日(5日)下午5點，有網民都繼續作呼籲，甚至出埋範本，方便市民提交意見。