政Whats噏：蒙德揚獲頒「旭日中綬章」　望東京奧運幫到手

香港日本文化協會前會長蒙德揚一直推動兩地嘅文化交流，日本政府今日(4日)宣布頒授「旭日中綬章」畀佢，以表揚佢喺呢方面同強化兩地經濟嘅貢獻。日本踏入令和元年，佢係首名港人獲頒授呢個勳章。

身在德國嘅蒙德揚回覆我哋查詢時話，對獲頒勳章感到好開心，又話會繼續推動兩地文化交流。至於未來有乜新大計？佢話同過往所做嘅唔會有分別，但明年東京舉行奧運會，佢希望到時自己可以幫到手。

至於令和第一，即係首名獲此勳章嘅係台灣新光醫院董事長吳東進，表揚佢促進台日醫療領域交流同推廣日本文化。其實，旅日嘅香港女歌手陳美齡喺舊年五月亦獲頒發旭日小綬章，表揚佢對社會嘅貢獻。