每日一片：板仔馬路亂片　飛身墮地極驚險

馬路當極限運動場？踩板雖然是具挑戰性運動，但亦要選擇適當場地。近日有車Cam就直擊一名板仔在馬路行車線滑行，結果自炒飛墮地下，有網民為板仔慶幸，當時未有車駛至，總算不幸中之大幸。

現場是九龍灣臨興街，事發於昨日(4日)中午約一時。片段開始，一名孭着背囊的青年踩着滑板在對面行車線滑行，不過數秒間，意外便發生，滑行期間，青年突然失去平衡，整個人俯身向前仆，衝力下更飛出數十呎外墮地，眼鏡亦飛脫。意外後，青年自行站起，又望一望手肘位置，似乎仆倒時擦傷，然後拾回眼鏡及滑板，緩緩走回行人路離去。

網民看過片段後，都為青年抹一額汗，「好彩冇車嚟緊」，不過有人卻將焦點放在其飛墮一刻動作，戲謔是「完美瞓身」、「冇水花，畀10分」。亦有網民批評青年「直路都炒」，明顯與技術有關，建議他不要再在馬路玩滑板，否則害人害己。